L’èx-guerrilhièr del Movement de Liberacion Nacionala Tupamaros (MLN) Héctor Amodio Pérez, tornèt divendres passat en Uruguai. Fasiá 40 ans qu’èra fugit e ne fasiá 50 que viviá “dins la clandestinitat”. Amodio apareguèt per presentar lo libre entitolat Palabra de Amodio (paraula d’Amodio) de l’escrivan Jorge Mairus. Dins aquel libre s’explica lo ponch de vista d’Amodio sus la guerrilha qu’agiguèt en Uruguai dins las annadas 1960-1970, ont tanben luchèt l’actual ministre de la defensa Eleuterio Fernández Huidobro e quitament l’èx-president José Mujica, conegut per son estil de vida umil e per aver renonciat al salari presidencial, en ne destinant  lo 90% a de causas socialas.
 
Amodio es considerat coma un traïdor pels èx-membres de l’MLN. Après lo còp d’estat militar que prenguèt lo poder d’Uruguai en 1973, li concediguèron un daissatz-passar per que se poguèsse exiliar en Espanha, e en contrapartida, Amodio auriá donat d’informacions sus l’MLN a la dictatura. Ça que la, l’èx-guerrilhièr nega aquel ròtle e ditz e defend qu’acceptèt la proposicion dels militars perque i aviá pas cap d’autra alternativa, qu’”en 1973 l’MLN existissiá pas mai” e qu’aviá paur de venjanças de sos eventuals companhs de preson.
 
Lo libre qu’es anat presentar en Uruguai conta son testimoniatge per mostrar un autre vejaire de çò qu’el considèra coma “l’istòria oficiala de l’MLN”.
 
“Es la primièra oportunitat miá per que qualqu’un faga entendre ma votz. Fa fòrça temps qu’ensagi de parlar mas me barrèron absoludament totas las pòrtas”, çò diguèt.
 
Amodio anèt en Uruguai protegit per un grop de gàrdias del còrs e planhèt que se faguèt pas brica de publicitat del libre que se presentava. Dins son discors, critiquèt l’èx-president Mujica, en disent qu’”a creat un personatge e lo deu representar”, encara que reconeguèt qu’auriá votat per el.
 
A l’ora d’ara, es pensionat en Espanha, e ditz que i deu retornar per trabalhar. Segons el, sa pension de 600 èuros li permet pas de subreviure.